《得宠先生》将于11月7日亮相「HKAFF香港亚洲电影节2024」，并于28日正式上映。男主角郑丹瑞（旦哥）破天荒饰演火爆废老，与戏中女儿廖子妤吵吵闹闹，旦哥点名她有120分超班演出。首次拍电影的冯允谦（Jay）「薯look」造型，与爱心爆棚的狗义工卢慧敏（Amy)演情侣，还有饰演Amy闺密的动物医生黄正宜（阿正）。电影将于9日于英皇戏院（康城）举行两场「狗狗友善电影放映会」，旦哥和Amy现身分享。
早前一众台前幕后和狗演员们举行开镜拜神仪式，风趣幽默的旦哥与一众年轻演员打成一片。廖子妤爆料在拍摄现场播旦哥其中一首名曲《留给最爱的说话》，她笑说：「一播读白『湿滑嘅司机 粗心大意嘅马路』，旦哥就会问我哋『係咪想听Live？唔做！』我哋好期待佢现场演绎，但佢又唔肯。」唱家班Jay说：「旦哥好锺意听Jazz，等埋位就唱，我好想同佢Jam歌。」
Jay说：「我知道旦哥出过歌，听讲係香港第一代Rapper！」旦哥1993年推出歌曲《那夜我替女儿「R」背脊》，街知巷闻。旦哥说：「我查过Rapper意思，即係『数白榄』，我係第一代『数白榄』，你哋摩登啲咪叫Rapper啰！『那夜我替女儿R背脊⋯⋯』我用罗文、郑少秋腔，『R得佢舒服⋯⋯』」在旁阿正爆笑，旦哥歌兴被打断，扮生气对她说：「你再笑就无面畀！」
阿正发挥主持本色，访问各人对前辈旦哥合作学到的东西和优点，廖子妤大讚戏中爸爸旦哥：「高、靓仔、好脾气、好肯教新人、成日请我哋饮咖啡，太多优点，我真係唔想离个剧组！」旦哥笑说：「你数紧MIRROR？我係第十三人？」廖子妤强调是真心话：「同旦哥合作大压力，但又好易入戏，佢真係畀到我『爸爸』嘅感觉，我哋有几场戏一见面就要面左左，戏中父女关係有啲似我真实故事，好容易投射到。刚才拍嗰场，喊到不得了，多谢旦哥。」旦哥说：「佢投入到，我希望佢有80分，结果佢做到120分。」旦哥对廖子妤很高评价。
风趣的旦哥扮恶样，说：「呢部戏将真实嘅郑丹瑞显露出嚟，燥狂啦，郁啲就闹人，你哋觉得好，其实係假嘅。将自己好多真实一面挖出嚟，好赤裸，但好好，可以试一次咁样做。好难得今时今日遇到好剧本，我亦最开心遇到新导演，过去几十年，好多人帮我，好多贵人。去到今日我觉得係时候帮得上、有需要我，尤其是电影，我就去帮。最重要一件事：我对狗有敏感，而我竟然同狗狗拍咗一部电影，建立咗好好关係，呢个係一个好大挑战，好好玩！」
阿正扬言爸爸是旦哥的铁粉，她说：「我依家企喺旦哥隔离好光荣，Hello Daddy妈咪！最紧张同旦哥有一场嗌交戏，剧情我同Amy怀疑旦哥落毒害啲狗，然后我哋对骂，期间Amy同旦哥嗌交我就夹喺中间。大家都睇到身高差，我对佢哋毫无威胁，所以有啲插枓打混嘅感觉。」她本色演出，为严肃的剧情增添不少欢乐。
本身很喜爱动物的Amy坦言特别开心，说：「我最感恩係可以同有经验演员合作，学到好多嘢，拍摄、待人接物、处事、处理自己情绪。」廖子妤鼓励她：「你做得好好！」Jay说：「最难忘有一场戏我哋同Amy要搬运铁栏，旦哥就问我一条IQ题，依家唔剧透住，但好好笑，好开心。」Amy爆料：「最搞笑场戏拍完，到依家，Jay仲未明白IQ题嘅答案。」
第一次拍电影的Jay表示又紧张又兴奋，他说：「今次第一次拍电影，感觉比我预料中好，虽然我唔係好多戏份，但都会无得瞓觉和好大压力。我同Amy对手戏较多，同佢合作好舒服，佢无嫌我做得唔够好，仲成日鼓励我，多谢Amy。」Amy受宠若惊：「我点会嫌你呀！」
